الأحكام والشروط

هاي الشروط اتفاق بينك وبين وينك، الخدمة اللي تقدّمها فيرتكس. لما تطلب ستيكر، أو تفعّله، أو تصوّر ستيكر وتدز تنبيه، أو تستعمل حسابك أو أي جزء من الخدمة، فإنت موافق على هاي الشروط وعلى سياسة الخصوصية. وإذا ما توافق، لا تستعمل الخدمة.

لازم يكون عمرك 18 سنة أو أكثر حتى تطلب ستيكر أو تفتح حساب. وإذا تسجّل سيارة مو باسمك، مثل سيارة الشغل أو سيارة واحد من أهلك، لازم تكون عندك موافقة صاحبها.

وينك ستيكر QR تلصقه على جامة سيارتك. اللي يحتاجك يصوّره بكاميرة الموبايل، يختار شنو المشكلة، ويوصلك تنبيه على الواتساب، بدون ما يشوف رقمك ولا إنت تشوف رقمه.

وينك وسيلة تواصل بس. مو خدمة طوارئ، ولا حماية من السرقة، ولا تأمين على السيارة، ولا بديل عن الشرطة أو الإسعاف أو الدفاع المدني. إذا أكو خطر على حياة أحد، اتصل بالجهات الرسمية مباشرة.

التنبيهات توصل عن طريق الإنترنت وواتساب وشركات الاتصالات، فممكن تتأخر أو ما توصل إذا صار عطل عندهم، أو إذا موبايل صاحب السيارة مطفي أو بلا إنترنت. نشتغل حتى يوصل كل تنبيه بثواني، بس ما نكدر نضمن وصول كل تنبيه بوقته.

الستيكر يتفعّل برمز يوصلك على الواتساب، ويبقى مربوط بالرقم اللي فعّله. وإنت كصاحب السيارة:

• تكتب معلومات صحيحة، وتخلي رقم الواتساب المسجّل شغّال حتى توصلك التنبيهات.
• تحافظ على رموز الدخول والتفعيل وما تنطيها لأحد، وتتحمّل أي شي يصير من حسابك.
• تلصق الستيكر على سيارة مالتك، أو سيارة عندك حق تستعملها.
• إذا بعت السيارة، أو ضاع الستيكر أو تلف، راسل خدمة الزبائن حتى نوقفه أو نفك ربطه من رقمك.

التنبيهات مشمولة بكل الباقات. وحتى تبقى الخدمة سريعة وموثوقة للكل، وما تصير وسيلة إزعاج، عدنا حدود لعدد التنبيهات. كل المدد تنحسب من هسه لورا: آخر 24 ساعة، وآخر 30 يوم، وآخر 365 يوم.

كم تنبيه يوصل لصاحب الستيكر

• 3 تنبيهات خلال أي 24 ساعة.
• 5 تنبيهات خلال أي 30 يوم.
• 60 تنبيه خلال أي سنة.
• تنبيهات الطوارئ بالباقة العائلية إلها حد لوحدها: 24 تنبيه بسنة الاشتراك، وما تنحسب ويّا الحدود اللي فوق.
• التنبيه التجريبي اللي تدزه لنفسك من حسابك ما ينحسب.

حدود اللي يصوّر الستيكر

حتى محد يكدر يزعج صاحب السيارة بتنبيهات ورا بعض:

• ينتظر 10 دقايق بين تنبيه وتنبيه.
• يدز تنبيهين بالكثير لنفس الستيكر خلال 24 ساعة.
• يدز 10 تنبيهات بالكثير خلال 24 ساعة، لكل الستيكرات سوا.
• ومن نفس شبكة الإنترنت، 20 تنبيه بالكثير خلال 24 ساعة.

إذا انتجاوز حد

• التنبيه ما يندز، واللي يصوّر الستيكر يطلعله إن صاحب السيارة وصله تنبيه قبل شوية.
• إذا شفنا استعمال آلي أو احتيال أو إزعاج، نكدر نوقف التنبيهات من الشخص أو من الشبكة أو على الستيكر.
• وصاحب السيارة يكدر يحظر أي واحد يزعجه بضغطة من رسالة التنبيه، ويوقف التنبيهات مؤقتاً من حسابه.

ليش هالحدود؟

الستيكر للمواقف الحقيقية: سيارة قافلة على أحد، ضوء شغّال، شبّاك مفتوح، أو صدمة بالغلط. والحدود تحمي صاحب السيارة من الإزعاج، وتخلي التنبيهات المهمة توصل بسرعة.

ممنوع تستعمل وينك حتى:

• تزعج أو تهدد أو تلاحق أو تحتال على أي أحد، أو تنتحل صفة شخص ثاني أو جهة رسمية.
• تدز تنبيهات كاذبة أو مزح أو إعلانات، أو تكرر التنبيهات بدون سبب.
• تحاول تعرف رقم صاحب السيارة، أو تلتف على حدود التنبيهات، أو تستعمل برامج آلية تدز تنبيهات أو تجمع معلومات.
• تحاول تخترق الموقع أو تعطّله أو تفحص حمايته بدون إذن منّا.
• تسجّل سيارة أو رقم موبايل مو إلك، أو تلصق الستيكر على سيارة غيرك بدون موافقته، أو تقلّد ستيكر وينك أو تزوّره.

الباقات وأسعارها وأجور التوصيل تبين بالموقع قبل ما تأكد طلبك، والسعر اللي تشوفه وقت الطلب هو اللي تدفعه.

• تدفع عند الاستلام للمندوب، وماكو أي دفع مسبق.
• نأكد الطلب ويّاك قبل الشحن، برمز يوصلك على واتساب أو باتصال، وتكدر تلغيه قبل ما يطلع للتوصيل.
• إذا وصلك الستيكر بيه عيب بالطباعة أو ما يشتغل، راسل خدمة الزبائن ونحلّها وياك.
• الاشتراك سنة كاملة تبدي من يوم تفعيل الستيكر.
• ما نسحب منك فلوس تلقائياً أبداً. نذكّرك على الواتساب قبل ما ينتهي اشتراكك، وإذا تريد تجدّد تراسل خدمة الزبائن.
• إذا انتهى الاشتراك وما جدّدت، التنبيهات توقف، وترجع تشتغل على نفس الستيكر أول ما تجدّد.
• حدود التنبيهات بكل الباقات حسب الاستخدام العادل اللي فوق.

• اسم وينك وشعاره، وتصميم الستيكر، والموقع بنصوصه وصوره وبرمجته، كلها ملك إلنا ومحمية بالقانون. ممنوع تنسخها أو تقلّدها أو تستعملها بدون إذن مكتوب منّا.
• نسمحلك تستعمل الخدمة للغرض اللي انسوّت إله بس. وهذا السماح شخصي ما ينتقل لغيرك، ونكدر نسحبه إذا خالفت هاي الشروط.
• الكلام اللي تكتبه، مثل ملاحظة التنبيه أو ردك عليه، يبقى إلك. وتسمحلنا نحفظه ونوصله بالقدر اللي تحتاجه الخدمة حتى تشتغل وتبقى آمنة.

تكدر توقف استعمال الخدمة بأي وقت، وتطلب حذف معلوماتك مثل ما مشروح بـسياسة الخصوصية.

ونكدر نوقف أو نقيّد حساب أو ستيكر أو مرسل إذا:

• صار إزعاج أو احتيال أو مخالفة لهاي الشروط.
• صار خطر على أمان الخدمة أو على أي أحد، أو انطلب منّا بأمر قانوني.
• رجع الطلب أو انلغى: الستيكرات اللي بيه توقف وما تتفعّل.

وإذا الوقت يسمح، نبلغك قبل ونعطيك فرصة تصلّح المشكلة.

نقدّم الخدمة مثل ما هي وحسب توفرها. نشتغل حتى تبقى شغّالة طول الوقت، بس ما نضمن إنها ما تنقطع أبداً أو ما يصير بيها خطأ، وما نضمن إن التنبيه يمنع الضرر أو يرجّع شي ضايع.

وينك مو مسؤولة عن:

• الكلام اللي يكتبه المبلّغ، أو تصرفات صاحب السيارة والمبلّغ ويّا بعض.
• أي ضرر أو سرقة أو غرامة تصير للسيارة أو لأي أحد.
• تأخر التنبيهات أو ضياعها بسبب واتساب أو شركات الاتصالات أو الإنترنت أو الموبايل.

وبكل الأحوال، مسؤوليتنا ما تتجاوز المبلغ اللي دفعته لاشتراكك الحالي. وهذا كله ما يلغي أي حق إلك يضمنه القانون.

نكدر نحدّث هاي الشروط إذا تغيّرت الخدمة أو القانون. نحدّث التاريخ اللي فوق، وإذا التغيير كبير نبلغك على واتساب قبل ما يبدي.

هاي الشروط تخضع للقوانين النافذة بجمهورية العراق. وإذا صار أي خلاف، نحاول نحلّه وياك بالتراضي أول، عن طريق خدمة الزبائن.

عندك سؤال عن هاي الشروط؟ راسل خدمة الزبائن على واتساب.